ເມືອງຈຳພອນເລັ່ງເຄື່ອນຍ້າຍປະຊາຊົນ,ສັດລ້ຽງ ແລະ ເຄື່ອງໃຊ້ທີ່ຈຳເປັນໄປໄວ້ບ່ອນທີ່ປອດໄພ

ທ່ານ ຄຳລຸຍ ຍາດຕິວົງ ເຈົ້າເມືອງຈຳພອນ ໄດ້ໃຫ້ສຳພາດຕໍ່ຜູ້ສື່ຂ່າວສະຖານີວິທະຍຸຂອງພວກເຮົາ ໃນຄັ້ງວັນທີ 8 ກັນຍາ 2019 ນີ້ກ່ຽວກັບສະພາບນ້ຳຖ້ວມທີ່ເມືອງຈຳພອນ ແຂວງສະຫວັນນະເຂດ ໂດຍທ່ານໄດ້ໃຫ້ຮູ້ວ່າ: ເລີ່ມແຕ່ວັນທີ 23 ສິງຫາ 2019 ນ້ຳໄດ້ໄຫຼເຂົ້າຖ້ວມພື້ນທີ່ການຜະລິດຂອງປະຊາຊົນໃນບາງເຂດທີ່ເປັນພື້ນທີ່ຕ່ຳ ຈາກນັ້ນນ້ຳກໍ່ໄດ້ຖ້ວມສູງຂຶ້ນເລື້ອຍໆຈົນຮອດປັດຈຸບັນນ້ຳກໍ່ຍັງເພີ່ມຂຶ້ນຢ່າງຕໍ່ເນື່ອງ ທາງການນຳຂອງເມືອງແມ່ນເລີ່ມເຄື່ອນຍ້າຍປະຊາຊົນ,ສັດລ້ຽງ ແລະ ເຄື່ອງໃຊ້ທີ່ຈຳເປັນແຕ່ວັນທີ 25 ສິງຫາ ເປັນຕົ້ນມາ ສຳລັບບ້ານທີ່ຢູ່ນອກເຂດເທດສະບານ ສ່ວນວ່າບ້ານທີ່ຢູ່ພາຍໃນເຂດເທດສະບານເມືອງຈຳພອນແມ່ນໄດ້ມີການເຄື່ອນຍ້າຍປະຊາຊົນໃນຄັ້ງວັນທີ 4 ກັນຍາ ຈົນມາຮອດປັດຈຸບັນກໍ່ຍັງໄດມີການເຄື່ອນຍ້າຍປະຊາຊົນ ແລະ ເຄື່ອງໃຊ້ທີ່ຈຳເປັນຢ່າງຕໍ່ເນື່ອງ.

ທາງເມືອງແມ່ນໄດ້ກຽມສູນພັກຊົ່ວຄາວສຳລັບປະຊາຊົນທີ່ໄດ້ຮັບຜົນກະທົບມີ 2 ສູນຄື: ສູນສຳນັກງານປົກຄອງເມືອງຫຼັງເກົ່າ ແລະ ສູນຫ້ອງວ່າການປົກຄອງເມືອງຫຼັງໃໝ່ ເພື່ອໄວ້ເປັນບ່ອນເກັບມ້ຽນເຄື່ອງຂອງ,ສັດລ້ຽງ ແລະ ຍານພາຫະນະ ສຳລັບປະຊາຊົນເອງສ່ວນໃຫຍ່ແມ່ນໄປພັກອາໃສຢູ່ນຳເຮືອນພີ່ນ້ອງບ່ອນທີ່ຍັງບໍ່ຖືກນ້ຳຖ້ວມ.
ທ່ານ ຄຳລຸຍ ຍາດຕິວົງ ເວົ້າຕື່ມອີກວ່າ: ທົ່ວເມືອງຈຳພອນ ມີເນື້ອທີ່ ທີ່ຖືກນ້ຳຖ້ວມທັງໝົດ 10.000 ກວ່າເຮັກຕາ,ກວມເອົາ 59 ບ້ານ,ມີ 6.666 ຄອບຄົວ,ບ້ານທີ່ຖືກນ້ຳຖ້ວມມີ 17 ບ້ານ ແລະ ບ້ານທີ່ຖືກຕັດຂາດດ້ານຖະໜົນຫົນທາງບໍ່ສາມາດສັນຈອນທາງບົກມີ 12 ບ້ານ ທີ່ຕ້ອງໄດ້ໃຊ້ເຮືອໃນການຂົນສົ່ງຄົນ,ສັດລ້ຽງ ແລະ ເຄື່ອງໃຊ້ຕ່າງໆ. ສຳລັບມາດຕະການໃນການຊ່ວຍເຫຼືອຜູ້ປະສົບໄພ ທາງເມືອງແມ່ນໄດ້ນຳໃຊ້ກຳລັງທະຫານ,ຕໍາຫຼວດ,ພະນັກງານ,ຊາວໜຸ່ມ,ກູ້ໄພທີ່ມາຈາແຂວງ ແລະ ເມືອງ ລວມທັງໃຊ້ກໍາລັງແຮງຂອງນັກສຶກສາຈາກມະຫາວິທະຍາໄລສະຫວັນນະເຂດ ແລະ ພີ່ນ້ອງປະຊາຊົນບ້ານໃກ້ຄຽງເຂົ້າໃຫ້ການຊ່ວຍເຫຼືອ


ສ່ວນວ່າສິ່ງຈຳເປັນທີ່ຕ້ອງການຢ່າງຮີບດ່ວນໃນປັດຈຸບັນເຂົ້າໃນການຊ່ວຍເຫຼືອປະຊາຊົນແມ່ນເຮືອ ແລະ ຄົນຂັບເຮືອ ເພື່ອລຳລຽງປະຊາຊົນ ແລະ ເຄື່ອງໃຊ້ທີ່ຈຳເປັນອອກມາໄວ້ບ່ອນປອດໄພ. ນອກຈາກນັ້ນກໍ່ແມ່ນເຄື່ອງອຸປະໂພກ,ບໍລິໂພກ ເພາະວ່າປະຊາຊົນບາງຄອບຄົວກໍ່ໄດ້ແຕ່ເຄື່ອງນຸ່ງຄາຄີງ ແລະ ອາຫານ,ນ້ຳດື່ມກໍ່ຍັງບໍ່ພຽງພໍ. ອາຫານທີ່ຕ້ອງການດ່ວນທີ່ສຸດແມ່ນເປັນອາຫານປະເພດທີ່ສຸກແລ້ວ ຫຼື ອາຫານແຫ້ງສຳເລັດຮູບ ສາມາດຮັບປະທານໄດ້ເລີຍ ເນື່ອງຈາກວ່າປະຊາຊົນບໍ່ມີໄຟຟ້າໃຊ້,ບໍ່ມີບ່ອນດັງໄຟເພື່ອປຸງແຕ່ງອາຫານໃນປັດຈຸບັນ


ຂ່າວ:ອັກສອນສິນ ພົມມະຈັນ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *