ທຸບແວ່ນລົດເສຍຫາຍ 8 ຄັນ

ພັທ ວິລະສອນ ພິໄຂຄໍາ ຫົວໜ້າພະແນກຕໍາຫຼວດ ປກສ ເມືອງສີສັດຕະນາກ ນວ ໃຫ້ຮູ້ວ່າ: ພາຍຫຼັງໄດ້ຮັບແຈ້ງຄວາມຈາກເຈົ້າໜ້າທີ່ ປກສ ກຸ່ມສີສັງວອນ ໃນວັນທີ 30 ຕຸລາ 2019 ເວລາ 12:30 ໂມງວ່າ: ໄດ້ມີ ທ້າວ ສົມໃຈ (ໃຈ) ອາຍຸ 44 ປີ ກໍາມະກອນ ພັກເຊົາຢູ່ບ້ານ ຫາດຊາຍຂາວ ເມືອງຫາດຊາຍຟອງ ນວ ໄດ້ກໍ່ເຫດອາລະວາດໃຊ້ພ້າຟັນໝູ່ຊື່ ທ້າວ ຖາວອນ (ນ້ອຍ) ອາຍຸ 38 ປີ, ຢູ່ບ້ານ ສ້າງເຫວີຍ ເມືອງສີສັດຕະນາກ ນວ. ຈາກນັ້ນ, ໄດ້ຍ່າງມຸ້ງໜ້າມາທາງບ້ານຫາດຊາຍຂາວ ເມືອງຫາດຊາຍຟອງ ນວ ແລ້ວໃຊ້ພ້າ ແລະ ກ້ອນຫີນ ທຸບແວ່ນລົດໃຫຍ່ທີ່ຈອດຢູ່ແຄມທາງ ບໍລິເວນງານດອງ ບ້ານຫາດຊາຍຂາວ ຈໍານວນ 8 ຄັນ ເມື່ອໄດ້ຍິນຄືແນວນັ້ນ ເຈົ້າໜ້າທີ່ໜ່ວຍງານວິຊາສະເພາະ ປກສ ເມືອງສີສັດຕະນາກ, ຈຶ່ງໄດ້ສົມທົບກັບພາກສ່ວນທີ່ີກ່ຽວຂ້ອງ ລົງກວດກາສະຖານທີ່ເກີດເຫດຕົວຈິງ ແລ້ວສາມາດກັກຕົວຜູ້ກໍ່ເຫດໄດ້ ພ້ອມຂອງກາງມີພ້າ ແລະ ມີດ ທີ່ໃຊ້ໃນການກໍ່ເຫດມາດໍາເນີນຄະດີ.

ຜ່ານການສືບສວນ-ສອບສວນຂອງເຈົ້າໜ້າທີ່ ປກສ ເມືອງສີສັດຕະນາກ ທ້າວ ສົມໃຈ ຍອມຮັບສາລະພາບວ່າ: ໄດ້ຮູ້ຈັກກັບ ທ້າວ ນ້ອຍ ມາດົນແລ້ວ ແລະ ກໍເຄີຍຖືກທໍາຮ້າຍຮ່າງກາຍມາແລ້ວ 1 ຄັ້ງ, ໂດຍຖືກ ທ້າວ ນ້ອຍ ເອົາມີດຟັນຄໍຂ້າງຂວາ ໄດ້ຍິບ 13 ເຂັມ. ຈາກນັ້ນ, ຈຶ່ງເກີດມີແນວຄິດຄຽດແຄ້ນໃຫ້ ທ້າວນ້ອຍ, ມາໃນຕອນເຊົ້າຂອງ ວັນທີ 30 ຕຸລາ 2019 ເວລາ 8:00 ໂມງ ຈຶ່ງຈັບເອົາພ້າ ແລະ ມີດ 1 ດວງ ຍ່າງໄປຫາ ທ້າວ ນ້ອຍ ເພື່ອຈະໄປຄາດຕະກໍາ ພໍໄປຮອດເຮືອນຂອງ ທ້າວ ນ້ອຍ ຕົນໄດ້ໃຊ້ພ້າທີ່ຖືມາທຸບໃສ່ປ່ອງຢ້ຽມເຮືອນ ແລະ ເຫັນ ທ້າວ ນ້ອຍ ແລະ ເມຍ ຢູ່ໃນເຮືອນ ຕົນຈຶ່ງຕີ ທ້າວ ນ້ອຍ ແລະ ເອົາພ້າຟັນໃສ່ແຂນຂວາ ຈົນໄດ້ຮັບບາດເຈັບ ແລ້ວ ທ້າວ ນ້ອຍ ກັບເມຍ ໄດ້ເອົາຕົວລົບໜີໄປທາງຫຼັງເຮືອນ ຕົນຈຶງນໍາຕາມໄລ່ຟັນ ແຕ່ພໍມາຮອດເຂດບ້ານ ສ້າງເຫວີຍ ເຫັນມີປະຊາຊົນຢູ່ຫຼາຍຄົນຈຶ່ງເຊົານໍາຜູ້ກ່ຽວ. ຈາກນັ້ນ, ຕົນໄດ້ຍ່າງມາຕາມເສັ້ນທາງ ຮອດເຂດເຮືອນດອງ ບ້ານຫາດຊາຍຂາວ ຈຶ່ງເກີດຄວາມໂມໂຫແຮງ ທີ່ຄາດຕະກໍາ ທ້າວ ນ້ອຍ ບໍ່ສໍາເລັດ ຈຶ່ງລົງມືເອົາພ້າທີ່ຖືມາ ແລະ ກ້ອນຫີນ ທຸບໃສ່ແວ່ນທາງໜ້າລົດໃຫຍ່ ຈົນໄດ້ຮັບຄວາມເສຍຫາຍຫຼາຍຄັນລວມມີ: ລົດກະບະ 5 ຄັນ ແລະ ລົດເກງອີກ 3 ຄັນ.

ຂໍ້ມູນຈາກ: ປກສ ນວ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *