ປູກຜັກຂາຍສ້າງລາຍຮັບໃຫ້ປະຊາຊົນ ປີລະເກືອບ 1,2 ຕື້ກີບ

ວຽງສາເປັນບ້ານຢູ່ໃນເທດສະບານ ເມືອງໄຊ ແຂວງອຸດົມໄຊ ເມື່ອກ່ອນປະຊາຊົນຍັງເຮັດໄຮ່,ເຮັດນາ, ເຮັດສວນ ແລະ ຫາກິນແບບທໍາມະຊາດ ເປັນສ່ວນໃຫຍ່ ລາຍຮັບຂອງຄອບຄົວບໍ່ໜັ້ນຄົງ ຊິີວິດການເປັນຢູ່ຂອງປະຊາຊົນ ພາຍໃນບ້ານຍັງທຸກຍາກ, ມີຄອບຄົວທຸກ 8 ຄອບຄົວ. ສະເລ່ຍລາຍຮັບ 3-4 ລ້ານກີບ/ຄອບຄົວ.


ທ່ານບຸນທອງ ພົມມະສອນ ນາຍບ້ານບ້ານວຽງສາ ລາຍງານຕໍ່ກອງປະຊຸມໃຫ່ຍຜູ້ແທນອົງຄະນະພັກເມືອງໄຊຄັ້ງທີ່13 ທີ່ຈັດຂື້ນຢູ່ສະໂມສອນແຂວງອຸດົມໄຊ ໃນວັນທີ່ 30-31 ຕຸລາ 2019 ວ່າ: ໂດຍພາຍໃຕ້ການນໍາພາຂອງຄະນະພັກ, ອົງການປົກຄອງບ້ານ ແລະ ຄວາມຕື່ນຕົວຂອງປະຊາຊົນໃນການສ້າງເສດຖະກິດຄອບຄົວ ມາຮອດປີ 2007 ຄອບຄົວຂອງຕົນເອງໄດ້ລິເລີ່ມປູກຜັກໃນເຮືອນຮົ່ມເປັນຜູ້ທໍາອິດ ເຊິ່ງເປັນໜໍ່ແໜງໃນການລິເລີ່ມ ແລະ ເປັນບົດຮຽນທີ່ດີ ມີຜົນສໍາເລັດເປັນບົດຮຽນໃຫ້ປະຊາຊົນພາຍໃນບ້ານຫັນມາປູກພືດຜັກໃນເຮືອນຮົ່ມ ຈົນເປັນທີ່ຍອມຮັບຂອງສັງຄົມມາເຖິງປະຈຸບັນ ເມື່ອເຫັນວ່າການ ປູກຜັກໄດ້ດີ ມີລາຍຮັບເຂົ້າຄອບຄົວ ,ຫຼາຍຄອບຄົວທີ່ມີດີນຢູ່ໃກ້ຄຽງ ໄດ້ຫັນມາປູກຜັກໃນເຮືອນຮົ່ມ ໃນປີ 2010 ມີ 8 ຄອບຄົວໄດ້ຫັນມາປູກພືດຜັກໃນເຮືອນຮົ່ມ, ມີໂຮງເຮືອນ 13 ຫຼັງ ຕໍ່ມາ ຫຼາຍຄອບຄົວທີ່ມີເນື້ອທີ່ນາຢູ່ເຂດໃກ້ຄຽງ ເຫັນວ່າການປູກຜັກມີລາຍໄດ້ດີກວ່າການເຮັດນາ, ເຮັດໄຮ່ ,ຮັບຈ້າງ ຈຶ່ງພາກັນຫັນມາປູກຜັກໃນເຮືອນຮົ່ມເພີ່ມຂື້ນເປັນຈໍານວນຫຼາຍ.


ມາຮອດປີ 2014 ຂະແໜງສົ່ງເສີມກະສິກໍາ ແລະ ສະຫະກອນ ສົມທົບກັບຫ້ອງການກະສິກໍາ ແລະ ປ່າໄມ້ເມືອງໄຊ ໄດ້ລົງໄປຊຸກຍູ້ດ້ານວິຊາການ ແລະ ຈັດຕັ້ງເປັນກຸ່ມຜະລິດ ເວລານັ້ນ ມີສະມາຊິກກຸ່ມປູກຜັກ 54 ຄອບຄົວ ມີໂຮງເຮືອນປູກຜັກ 220 ຫຼັງ ມາຮອດວັນທີ 6 ມັງກອນ 2017 ເຈົ້າເມືອງ ເມືອງໄຊ ໄດ້ອອກໃບອະນຸຍາດສ້າງຕັ້ງກຸ່ມຄຸ້ມຄອງການຜະລິດກະສິກໍາ ໃຫ້ກຸ່ມປູກຜັກໃນເຮືອນຮົ່ມບ້ານວຽງສາຢ່າງເປັນທາງການ ໂດຍໄດ້ຮັບການສະໜັບສະໜູນທຶນຈາກລັດຖະບານ ແລະ ໂຄງການ ດີດີເອັບຊີ ຈຳນວນໜື່ງ ມາຮອດປະຈຸບັນ ມີສະມາຊິກ ທັງໝົດ 55 ຄອບຄົວ ມີໂຮງເຮືອນ 240 ຫຼັງ ພືດຜັກທີ່ປູກມີຫຼາຍຊະນິດ ເຊັ່ນ: ຜັກກາດຊອມ, ຜັກສະຫຼັດ, ຜັກບົ່ວ, ຜັກຫອມປ້ອມ,ຜັກຊີ, ຜັກຫອມລາບ ແລະ ຜັກອື່ນໆ ຫຼາຍຊະນິດ ປູກຕາມຄວາມ ຕ້ອງການຂອງຕະຫຼາດ ລວມຜົນຜະລິດໄດ້ 200 ໂຕນ/ປີ. ສາມາດສ້າງລາຍຮັບຈາກການຂາຍພືດຜັກ 1,2 ຕື້ ກີບ/ປີ ສະເລ່ຍໃສ່ຄອບຄົວໄດ້ 21.000.000 ກວ່າກີບ/ຄອບຄົວ ຫຼື 5.660.000/ຄົນ/ປີ.

ເວົ້າລວມແລ້ວການປູກຜັກໃນເຮືອນຮົ່ມໂດຍການໃສ່ຝຸ່ນຄອກ ໄດ້ກາຍເປັນເປັນອາຊີບຕົ້ນຕໍຂອງຄອບຄົວ ເຮັດໃຫ້ຊີວິດການເປັນຢູ່ຂອງປະຊາຊົນບ້ານວຽງສາດີຂື້ນ, ປະຈຸບັນມີຄອບຄົວພົ້ນທຸກແລ້ວ 255 ຄອບຄົວ, ມີເຮືອນຖາວອນ168 ຫຼັງ ມີລົດໃຫ່ຍ 66ຄັນ, ລົດຈັກ 387 ຄັນ, ໂຮງສີເຂົ້າ20 ເຄື່ອງ ລູກຫຼານໄດ້ເຂົ້າໂຮງຮຽນແລະໄປຮຽນຕໍ່ວິຊາສະເພາະພາຍໃນແລະຕ່າງປະເທດ ຜົນສໍາເລັດທັງໝົດນີ້ຍ້ອນ ມີແນວທາງນະໂຍບາຍອັນຖືກຕ້ອງຂອງພັກ ທີ່ໄດ້ກະຕຸກຊຸກຍູ້, ສະໜັບສະໜູນ, ຊີ້ທິດເຍືອງທາງໃຫ້ແກ່ ຄະນະໜ່ວຍພັກ, ອົງການປົກຄອງບ້ານວຽງສາ ວາງແຜນພັດທະນາເສດຖະກິດ-ສັງຄົມຂອງບ້ານ ແລະມີຜົນສໍາເລັດ.

ໂດຍ: ນ້ອຍ ງອນວິໄລ (ວິທະຍຸກະຈາຍສຽງ)

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *