ຈະພັດທະນາ​ຕົວ​ເມືອງ​ທັນ​ສະໄໝ ຢູ່​ແຂວງ​ຫຼວງ​ນ້ຳ​ທາ ແລະ ແຂວງ​ອຸດົມ​ໄຊ

ກອງ​ປະຊຸມ​ລັດຖະບານ ສະໄໝ​ສາມັນ​ປະຈຳ​ເດືອນ​ຕຸລາ 2019 ໄດ້​ດຳເນີນ​ຢ່າງ​ເປັນ​ທາງ​ການ ໃນ​ວັນ​ທີ 25 ຕຸລາ 2019 ຜ່ານ​ມາ ທີ່​ສຳນັກງານ​ນາຍົກລັດຖະມົນຕີ ພາຍ​ໃຕ້​ການ​ເປັນ​ປະທານ​ຂອງ​ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ມີ​ບັນດາ​ທ່ານ​ຮອງ​ນາຍົກລັດຖະມົນຕີ ແລະ ສະມາຊິກ​ລັດຖະບານ ເຂົ້າ​ຮ່ວມ​ຢ່າງ​ພ້ອມພຽງ.

ກອງ​ປະຊຸມ​ລັດຖະບານ​ຄັ້ງ​ນີ້ ໄດ້​ພ້ອມ​ກັນ​ຄົ້ນຄວ້າ ປຶກສາ​ຫາລື ແລະ ພິຈາລະນາ 3 ເອກະສານ​ສຳຄັນ ຄື: ກອງ​ປະຊຸມ​ໄດ້​ຮັບຮອງ​ດ້ານ​ຫຼັກການ ບົດ​ສະຫຼຸບ​ຕີ​ລາຄາ​ການຈັດຕັ້ງ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມ ແຜນ​ງົບປະມານ ແຜນ​ເງິນຕາ ປະຈຳ​ປີ 2019 ແລະ ທິດ​ທາງ​ແຜນການ ປະຈຳ​ປີ 2020 ພ້ອມ​ນີ້ ໄດ້​ມອບ​ໃຫ້​ກະຊວງ​ແຜນການ ແລະ ການ​ລົງທຶນ ປະສານ​ສົມທົບ​ກັບ​ກະຊວງ​ການ​ເງິນ ທະນາຄານ ແຫ່ງ ​ສປປ ລາວ ແລະ ພາກສ່ວນ​ກ່ຽວຂ້ອງ ປັບປຸງ​ບົດ​ລາຍ​ງານ​ດັ່ງກ່າວ ຕາມ​ການ​ປະກອບ​ຄຳ​ເຫັນ​ຂອງ​ກອງ​ປະຊຸມ ພ້ອມ​ທັງ​ກະກຽມລາຍ​ງານ​ຕໍ່ກອງ​ປະຊຸມ​ສະໄໝ​ສາມັນ ເທື່ອ​ທີ 8 ຂອງ​ສະພາ​ແຫ່ງ​ຊາດ ຊຸດ​ທີ VIII ໃນ​ເດືອນ​ພະຈິກ 2019 ເພື່ອ​ພິຈາລະນາ ແລະ ອອກ​ມະຕິ​ຮັບຮອງ

 

ກອງ​ປະຊຸມ​ໄດ້​ຮັບ​ຟັງ​ການ​ລາຍ​ງານ ກ່ຽວ​ກັບ​ຜົນ​ຂອງ​ການຈັດຕັ້ງ​ປະຕິບັດ​ບົດ​ບັນທຶກ​ຄວາມ​ເຂົ້າໃຈ ເພື່ອ​ສຶກ​ສາ​ສຳ​ຫຼວດ​ຄວາມ​ເປັນ​ໄປ​ໄດ້ ແລະ ອອກ​ແບບ​ພັດທະນາ ໂຄງການ​ພັດທະນາ​ຕົວ​ເມືອງ​ທັນ​ສະໄໝ AMATA Smart and Eco City ຢູ່​ແຂວງ​ຫຼວງ​ນ້ຳ​ທາ ແລະ ແຂວງ​ອຸດົມ​ໄຊ ກອງ​ປະຊຸມ​ເຫັນ​ວ່າ ໂຄງການ​ດັ່ງກ່າວ​ເປັນ​ໂຄງການ​ທີ່​ມີ​ການ​ວິເຄາະ ວິໄຈ​ເສດຖະກິດ​ດີ​ສົມຄວນ ທັງ​ສອດຄ່ອງ​ກັບ​ທິດ​ທາງ​ຂອງ​ລັດຖະບານ ໃນ​ການ​ສົ່ງເສີມ​ການ​ລົງທຶນ ການ​ຜະລິດ​ພາຍ​ໃນ ແລະ ການ​ພັດທະນາ ຕາມ​ແລວ​ທາງ​ລົດໄຟ ລາວ-ຈີນ ພ້ອມ​ກັນ​ນັ້ນ ກໍ​ເຫັນ​ວ່າ ຜູ້​ລົງທຶນ​ມີ​ບົດຮຽນ ມີ​ທຶນຮອນ ມີ​ຊື່​ສຽງ ແລະ ມີ​ປະສົບ​ການ ຈາກ​ການ​ລົງທຶນ​ຂະໜາດ​ໃຫຍ່​ຢູ່​ຫຼາຍ​ປະເທດ​ມາ​ແລ້ວ ເປັນຕົ້ນ ຫວຽດນາມ ມຽນ​ມາ ແລະ ໄທ ທັງ​ມີ​ຄວາມ​ຕັ້ງໃຈ ແລະ ພະຍາຍາມ​ສູງ ເຖິງ​ແມ່ນ​ວ່າ​ພື້ນ​ທີ່​ດັ່ງກ່າວ​ຈະ​ມີ​ຄວາມ​ຫຍຸ້ງຍາກ ເປັນ​ພູຜາ ຍັງ​ບໍ່​ທັນ​ມີ​ພື້ນຖານ​ໂຄງ​ລ່າງ ແລະ ການ​ລົງທຶນ ກໍ​ຈະ​ມີ​ມູນ​ຄ່າ​ສູງ ດັ່ງນັ້ນ ຖ້າ​ໂຄງການ​ນີ້​ໄດ້​ຮັບ​ການຈັດຕັ້ງ​ປະຕິບັດ ກໍ​ຈະ​ເປັນ​ການ​ສະໜັບສະໜູນ ການ​ນຳ​ໃຊ້​ໂຄງການ​ທາງ​ລົດໄຟ ລາວ-ຈີນ ແລະ ຈະ​ປະກອບສ່ວນ​ສຳຄັນ​ຕໍ່​ການ​ພັດທະນາ ເສດຖະກິດ-ສັງຄົມ ຂອງ​ປະເທດ​ເຮົາ.

 

ແຕ່​ເຖິງ​ຢ່າງໃດ​ກໍ​ຕາມ ເນື່ອງ​ຈາກ​ໂຄງການ​ດັ່ງກ່າວ ຕິດ​ພັນ​ກັບ​ການ​ສະເໜີ​ຂໍ​ນະໂຍບາຍ​ສົ່ງເສີມ​ການ​ລົງທຶນ ແລະ ການ​ຊົດ​ເຊີຍ​ໃຫ້​ແກ່​ຜູ້​ໄດ້​ຮັບ​ຜົນ​ກະທົບ ກອງ​ປະຊຸມ​ຈຶ່ງ​ມອບ​ໃຫ້​ກະຊວງ​ແຜນການ ແລະ ການ​ລົງທຶນ​ເປັນ​ເຈົ້າ​ການ ສົມທົບ​ກັບ​ຂະແໜງ ການ ແລະ ທ້ອງຖິ່ນ​ກ່ຽວຂ້ອງ ຄົ້ນຄວ້າ​ບັນດາ​ຂໍ້​ສະເໜີ ແລະ ເຈລະຈາ​ກັບ​ບໍລິສັດ ເພື່ອ​ຮັບປະກັນ​ຜົນ​ປະໂຫຍດ​ຂອງ​ປະເທດ​ຊາດ ແລະ ປະຊາຊົນ ຫຼີກ​ລ່ຽງ​ຜົນ​ກະທົບ​ຕ່າງໆ​ທີ່​ຈະ​ເກີດ​ຂຶ້ນ ໂດຍ​ສະເພາະ ຜົນ​ກະທົບ​ທາງ​ດ້ານ​ສິ່ງແວດລ້ອມ ແລະ ສັງຄົມ ພ້ອມ​ທັງ​ຮັບປະກັນ​ຄວາມ​ສະຫງົບ ແລະ ຄວາມ​ເປັນ​ລະບຽບ​ຮຽບ​ຮ້ອຍ ຫຼັງ​ຈາກ​ນັ້ນ ໃຫ້​ມາ​ລາຍ​ງານ​ຜົນ​ການ​ເຈລະຈາ ເພື່ອ​ໃຫ້​ລັດຖະບານ​ພິຈາລະນາ​ຕໍ່​ໄປ.

ກອງ​ປະຊຸມ​ໄດ້​ຮັບ​ຟັງ​ລາຍ​ງານ ຄວາມ​ຄືບ​ໜ້າ ແລະ ທິດ​ທາງ​ແຜນການ ການຈັດຕັ້ງ​ປະຕິບັດ​ວຽກ​ຮ່ວມ​ມື​ສອງ​ຝ່າຍ ລາວ-ຫວຽດນາມ ລາວ-ຈີນ ແລະ ລາວ-ກຳປູເຈຍ ແລະ ໄດ້​ຊີ້​ນຳ​ໃຫ້​ຂະແໜງການ​ກ່ຽວຂ້ອງ​ເອົາໃຈໃສ່​ຕິດຕາມ​ຊຸກຍູ້ ແລະ ແກ້​ໄຂ​ບັນດາ​ຂອດ​ຄົງ​ຄ້າງ ເພື່ອ​ຜັນ​ຂະຫຍາຍ ແລະ ຈັດ​ຕັ້ງ​ປະຕິບັດ ເນື້ອ​ໃນ​ເອກະສານ ໂຄງການ ແລະ ກິດຈະກຳ​ການ​ຮ່ວມ​ມື ທີ່​ໄດ້​ຕົກລົງ​ກັນ ໃຫ້​ມີ​ປະ​ສິດທິ​ຜົນ.

ຂ່າວ: ນສພ ວຽງຈັນໃຫ່ມ

ພາບ: Alan hui

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *