ລາຍລະອຽດ ເຫດການລະເບີດຫີນ ຂອງໂຮງງານຊີມັງແຂວງຫລວງພະບາງ ຈົນມີການສູນເສຍທັງຊີວິດ ແລະຊັບສິນ

ຈາກບົດລາຍງານຂອງພະແນກອຸດສາຫະກຳແລະການຄ້າ ແຂວງຫຼວງພະບາງ ລົງວັນທີ 8/10/2019 ວ່າ ຂໍຖືເປັນກຽດລາຍງານສະພາບການລະເບີດຫີນຢູ່ໃກ້ກັບໂຮງງານຊີມັງ ຫຼວງພະບາງ ບ້ານໂພນມະນີ ເມືອງນ້ຳບາກ ແຂວງຫຼວງພະບາງ ທີ່ເປັນເຫດເຮັດໃຫ້ເກີດຄວາມເສຍຫາຍຕໍ່ຊີວິດ ແລະ ຊັບສິນ ຂອງປະຊາຊົນຈຳນວນຫນື່ງ ຈາກການລົງຕິດຕາມກວດກາ ແລະ ເກັບສະພາບ ໂດຍສົມທົບກັບຫ້ອງການອຸດສາຫະກຳ ແລະການຄ້າເມືອງນ້ຳບາກ, ໂຮງງານຊີມັງຫຼວງພະບາງມີດັ່ງນີ້:


ການລະເບີດຫີນທີ່ເກີດຂື້ນດັ່ງກ່າວແມ່ນການທຳລາຍທາດລະເບີດຂອງທ່ານລາວເຈົ່າ ເຊີ່ງເຄີຍເປັນຜູ້ຮັບເຫມົາໃນການຂຸດຄົ້ນ ແລະສະຫນອງຫີນປູນໃຫ້ແກ່ໂຮງງານຊີມັງຫຼວງພະບາງ ຈຳກັດ ໃນເມື່ອກ່ອນເຊີ່ງໄດ້ເຊັນສັນຍາກັບທ່ານ ວິທູນ ຊ່ຽວຈະເລີນ ຈາກການອ້າງອີງຂອງຜູ້ກ່ຽວແມ່ນຫມົດສັນຍາໃນເດືອນ 08/2018; ຫລັງຈາກທີ່ບໍລິສັດ ເກັດທາວລາວ ຈຳກັດຜູ້ດຽວ ໄດ້ມາຊື້ກິດຈະການໂຮງງານຊີມັງຫຼວງພະບາງຕໍ່ຈາກທ່ານວິທູນ ຊ່ຽວຈະເລີນ ໃນຄັ້ງວັນທີ່ 30/01/2019, ທ່ານ ລາວເຈົ່າ ໄດ້ສະເຫນີກັບໂຮງງານ ເລື່ອງຂໍສືບຕໍ່ສັນຍາໃນການເປັນຜູ້ຂຸດຄົ້ນ ແລະສະຫນອງຫີນປູນໃຫ້ກັບໂຮງງານ ແຕ່ທາງໂຮງງານໄດ້ປະຕິເສດ ເພາະໂຮງງານມີແຜນຈະພັດທະນາ ແລະຂຸດຄົ້ນບໍ່ຫີນດັ່ງກ່າວເອງເພື່ອຫຼຸດຜ່ອນຕົ້ນທືນການຜະລິດ


ຕໍ່ມາໂຮງງານຊີມັງໄດ້ສັງເກດວ່າທ່ານລາວເຈົ່າ ຍັງມີທາດລະເບີດຢູ່ໃນຄອບຄອງ ຈື່ງໄດ້ແຈ້ງມາຫາອຳນາດການປົກຄອງເມືອງ ເພາະເຫັນວ່າມີຄວາມສ່ຽງຕໍ່ຄວາມປອດໄພຂອງໂຮງງານ ຈາກນັ້ນທາງເຈົ້າເມືອງກໍ່ໄດ້ແຕ່ງຕັ້ງຄະນະກຳມະການແກ້ໄຂຂໍ້ຂັດແຍ່ງ ສະບັບເລກທີ 01, ລົງວັນທີ 03/10/2019 ເຊີ່ງມີເນື້ອໃນການແກ້ໄຂໂດຍຫຍໍ້ດັ່ງນີ້:
1. ໄດ້ພົບເຫັນທາດລະເບີດຈຳນວນ 14 ກິໂລ ຄະນະກຳມະການໄດ້ເອົາໄປເກັບມ້ຽນໄວ້ຢູ່ສາງຂອງກອງບັນຊາການທະຫານເມືອງນ້ຳບາກ
2. ກຳນົດເວລາຈູດທຳລາຍທາດລະເບີດທີ່ບັນຈຸໄວ້ໃນຫີນ ຈຳນວນ 4 ຈຸດ ຈຳນວນ 12 ໂຕນ ແມ່ນຈະທຳລາຍໃນວັນທີ່ 05/10/2019 ເວລາ 4:00-5:00 ໂມງແລງ. ໂດຍທຳລາຍລະເບີດຄັ້ງນີ້ ຫາກເກີດບັນຫາທຸກຢ່າງ ແມ່ນມອບໃຫ້ທາງເຈົ້າຂອງທາດລະເບີດ (ເຊີ່ງເປັນຜູ້ວາງ,ລະເບີດ) ເປັນຜູ້ຮັບຜິດຊອບທັງຫມົດ


ຈາກນັ້ນມາຮອດໃນຕອນແລງຂອງວັນທີ 05/10/2019 ເວລາປະມານ 16:52 ນາທີ ໄດ້ມີການລະເບີດຫີນເພື່ອທຳລາຍທາດລະເບີດທີ່ບັນຈຸໄວ້ ໃນຫີນ 4 ຈຸດ, ຈຳນວນ 12 ໂຕນ ໂດຍມີຄະນະກຳມະການຕິດຕາມ-ກວດກາຂອງເມືອງເຂົ້າຮ່ວມນຳ ໂດຍໄດ້ມີການແຈ້ງເຕືອນປະຊາຊົນທີ່ຢູ່ໃກ້ຄຽງ ຕາມທີ່ເຄີຍປະຕິບັດທຸກຄັ້ງກ່ອນຈູດລະເບີດ. ແຕ່ການລະເບີດເຫັນວ່າໄດ້ເກີດຄວາມຜິດພາດ ບໍ່ຮັບປະກັນດ້ານເຕັກນິກຂອງການວາງ ແລະ ຈູດ ອັນເປັນຜົນເຮັດໃຫ້ແຮງດັນລະເບີດນຳເອົາຫີນຈຳນວນຫລາຍກະຈາຍອອກມານອກເຂດ ແລະ ທິດທາງທີ່ກຳຫນົດ.

ຈາກການລາຍງານຄວາມເສຍຫາຍເບື້ອງຕົ້ນມີ: ຄົນເສຍຊີວິດ 1 ຄົນ, ບາດເຈັບສົມຄວນ 23 ຄົນ ເປັນຍິງ 5 ຄົນ, ໃນນັ້ນບາດເຈັບສາຫັດ 8 ຄົນ, ຍິງ 1 ຄົນ ແລະເປັນຄົນຈີນ 1 ຄົນ; ເຮືອນເປ່ເພ 81 ຫລັງ, ເສຍຫາຍຢ່າງຫນັກ 2 ຫລັງ, ລົດຈັກ, ມີລົດໃຫ່ຍໄດ້ຮັບຄວາມເສຍຫາຍ ອີກຫລາຍຄັນ; ດ້ານໂຮງງານຊີມັງ ແລະ ອາຄານຈຳນວນຫນື່ງ ໄດ້ຮັບຄວາມເສຍຫາຍ ປັດຈຸບັນໄດ້ຢຸດເຊົາການຜະລິດ ເພື່ອສຳຫຼວດປະເມີນຄວາມເສຍຫາຍ (ປັດຈຸບັນຄະນະກຳມະການສະເພາະກິດຂອງເມືອງກຳລັງເກັບຂໍ້ມູນ ເພື່ອປະເມີນຄວາມເສຍຫາຍລະອຽດ)
ຈາກບັນຫາທີ່ເກີດຂື້ນດັ່ງກ່າວ ທາງໂຮງງານຊີມັງໄດ້ມອບເງີນຊ່ວຍເຫຼືອຜູ້ໄດ້ຮັບເຄາະຮ້າຍໃນເບື້ອງຕົ້ນເປັນເງີນ 10,000,000 ກີບ. ສ່ວນຄອບຄົວຂອງທ່ານ ລາວເຈົ່າ ເຈົ້າຂອງທາດລະເບີດ ແລະ ເຈົ້າຫນ້າທີ່ໄດ້ກັກໂຕໄວ້ຢູ່ກອງບັນຊາການ ປກສ ເມືອງ ເພື່ອດຳເນີນຄະດີ.

ສະຫຼຸບແລ້ວ ເຫດການທີ່ເກີດຂື້ນດັ່ງກ່າວ ສາເຫດຍ້ອນຄວາມປະຫມາດ ດຳເນີນການລະເບີດບໍ່ຮັບປະກັນດ້ານເຕັກນິກ, ຄວາມປອດໄພ ບໍ່ໃຫ້ຄວາມຮ່ວມມືຢ່າງຈິງຈັງກັບພາກສ່ວນທີ່ກ່ຽວຂ້ອງ ຂອງເຈົ້າຂອງທາດລະເບີດ ອັນໄດ້ສົ່ງຜົນເສຍຫາຍຕໍ່ຊີວິດ, ຊັບສິນຂອງປະຊາຊົນຜູ້ຢູ່ໃກ້ຄຽງ ແລະ ໂຮງງານ ພ້ອມນັ້ນຍັງສ້າງຄວາມເສື່ອມເສຍໃຫ້ແກ່ພາບລັກຂອງໂຮງງານຊີມັງຫຼວງພະບາງ ຈຳກັດຜູ້ດຽວ ອີກດ້ວຍ.

 

 

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *