ປະຫວັດຄວາມເປັນມາ ສຸຂະຫັດຖີນາຄ

ສຸຂະຫັດຖີນາຄ ແມ່ນຮູບປັ້ນນາຄ ທີຫລາຍໆຄົນເກີດຄວາມສົງໄສວ່າ ມີປະຫວັດຄວາມເປັນມາແນວໃດ ມື້ນີ້ ເພຈ Art and Culture of Laos ຈະນຳເອົາປະຫວັດຄວາມເປັນມາຂອງການມີຮູບປັ້ນ ສຸຂະຫັດຖີນາຄ ນີ້ມາເລົ່າສູ່ຟັງ
ວັດໂພນສັນ ຊື່ເຕັມແມ່ນ ” ວັດນາຄານິມິດໂພນສັນ ” ແມ່ນຕັ້ງຢູ່ແຄມນ້ຳຂອງ ຕັ້ງຢູ່ເມືອງທ່າພຣະບາດ ແຂວງບໍລິຄຳໄຊ ຕາມທາງເລກທີ 13 ໃຕ້ ລະຫວ່າງ ນະຄອນຫຼວງວຽງຈັນ ຫາປາກຊັນ ຫ່າງຈາກ ນະຄອນຫຼວງວຽງຈັນ ປະມານ 82 ກິໂລແມັດ, ກົງກັນຂ້າມກັບພຣະບາດໂພນສັນ ຈະມີເສັ້ນທາງເຂົ້າໄປທາງດ້ານຂວາມື້ ໄລຍະທາງປະມານ 1,800 ແມັດ ວັດແຫ່ງນີ້ຕັ້ງຢູ່ເທິງໂພນຕິດແຄມຂອງ ແລະມີນ້ຳຫ້ວຍໄຫລຜ່ານ ເມື່ອຈະຂຶ້ນໄປເທິງສິມຂອງວັດເທິງໂພນ ຈະເຫັນມີຮູບປັ້ນຮູບ ສຸຂະຫັດຖີນາຄ ຕັ້ງຢູ່ເປັນທາງຂຶ້ນໄປສິມ ເຊິ່ງຈະແປກຕາ ທີບໍ່ເຄີຍພົບເຫັນໃສມາກ່ອນ ນັ້ນກໍ່ຄື ຮູບປັ້ນ ສຸຂະຫັດຖິນາຄ ທີມີຫົວ ມີງາ ມີງວງ ມີຫູ ຄືຊ້າງ ເຊິ່ງມີປະຫວັດຕາມຫນັງສືອຸຣັງຄະທາຕຸ ວ່າ : ກາລະຄັ້ງຫນຶ່ງພຣະສັມມາສັມພຸທທະເຈົ້າ ຊົງສະເດັດມາໂຜດສັດທັງຫລາຍໃນບໍລິເວນແຫ່ງນີ້ ໃນຕອນທີພຣະພຸທທະເຈົ້າສັນຈັງຫັນຢູ່ໂພນສັນແຫ່ງນີ້ ໄດ້ເຂົ້າມາເຝົ້າແລະໄດ້ຟັງທັມ ຈົນເກີດຄວາມເຫລືອມໃສຕໍໍ່ພຣະພຸທທະເຈົ້າ ແລະນາຄຈຶ່ງຂໍໃຫ້ພຣະອົງຊົງປະທັບຮອຍພຣະບາດໄວ້ບໍລິເວນພຣະບາດໂພນສັນ ແຫ່ງນີ້ ເພຶ່ອເປັນບ່ອນສັກກະຣະບູຊາສຶບຕໍ່ມາ.

ໄດ້ມີບົດຄວາມຂອງທ່ານ Soulixai LARTHIKOUN ຂຽນໄວ້ກ່ຽວກັບ ຮູບປັ້ນ ” ນາຄ ຫົວຊ້າງ ຢູ່ ວັດຣາຊໂພນເງີນ ” ນັ້ນ , ຖ້າ ຂ້າພະເຈົ້າ ກັສໂປ ນາ​ລາດ ເຂົ້າໃຈບໍ່ຜິດ ຮູບປັ້ນ​ນີ້ ອາດຈະຢູ່ ວັດ​ໂພນ​ເງີນ ບ້ານໂພນແພງ ຕຳບົນໂພນແພງ ອຳເພີໂພນພິໄສ ຈັງຫວັດໝອງຄາຍ ເພາະ ເປັນໝູ່ບ້ານ ຕັ້ງຢູ່ຝາກຝັ່ງ​ກົງກັນຂ້າມ ກັບ ວັດໂພນສັນ ບ້ານ​ທ່າ​ພຣະ​ບາດ ເມືອງ​ທ່າ​ພຣະບາດ ແຂວງບໍລິຄຳໄຊ ຫຼື ເປັນຂອບເຂດ​ຖີ່ນ​ກຳເນີດ ຂອງ ກັສໂປ ນາ​ລາດ …
ຕາມຕຳນານ ພຸດທະປະຫວັດສາດລາວ , ໄດ້ກ່າວໄວ້ວ່າ : ອົງພະຍານາກ ທີ່ ມີຮູບຮ່າງລັກສະນະ ຫົວເປັນ​ຊ້າງ ຫາງເປັນ​ນາກ ທີ່ ມີຊື່ ສຸຂະຫັດຖີ ນັ້ນ ແມ່ນ ເປັນຜູ້ ຂໍຮອຍພຣະບາດ ຂອງ ພຣະພຸດທະເຈົ້າ ເອົາໄວ້ ຢູ່ ລານ​ຫີນ​ດານ ຫຼື ວັດ​ພຣະ​ບາດ​ໂພນ​ສັນ ເພື່ອ ເປັນສີ່ງສັກສິດ ກາບ​ໄຫວ້ ແລະ ສັກກະຣະບູຊາ ເຊີ່ງ ຢູ່ໄກຈາກ ວັດ​ໂພນ​ສັນ ແຄມນ້ຳຂອງ ປະມານ 01 ກິໂລແມັດ​ ກວ່າ ໆ … ຫ່າງໄກ ຈາກ ວັດໂພນ​ສັນ ປະມານ 400 ແມັດ ຈະມີຖ້ຳໃຫຍ່ ເອີ້ນວ່າ ຖ້ຳເຈົ້າໂພນສັນ ເຊີ່ງ ຢູ່ໃກ້ໆ ກັບ ຫາດຊາຍ​ນອ້ຍ , ຢູ່ ປາກຖ້ຳແຫ່ງນີ້ ນ້ຳຈະໄຫຼເປັນເວີນ ພັດ​ປີ່ນ​ແຮງ ເຊີ່ງ ໃນຍາມ​ແລ້ງ ນ້ຳຈະມີສີໃສຂຽວ ແລະ ມີພວກໝູ່ປານ້ອຍໃຫຍ່ ລ່ອງ​ລອຍ ສະລັບ​ກັນ ຈຳນວນຫຼວງຫຼາຍ ແລະ ເປັນສະຖານທີ່ສັກສິດ ມະຫັດສະຈັນ ສົມຄວນ … ຢູ່ ບ້ານທ່າໂພນ​ສັນ ແຄມແມ່ນ້ຳຂອງ ແມ່ນ ມີ 04 ອ້າຍນ້ອງ ຕະກູນ ” ວົງສະຫວັນ ” ຊື່ : ພໍ່ຕູ້​ທ້າວ​ພົມ , ພໍ່ຕູ້​ທ້າວ​ໄພ , ພໍ່ຕູ້​ທ້າວເກີ່ງ , ແລະ ພໍ່ຕູ້​ຊຽງ​ຄຸນ ເປັນ ຜູ້ນຳພາໝູ່ພວກ ອົບພະ​ຍົກ ດ້ວຍການ ທໍ່ເຮືອແພ ຍ້າຍມາ​ຈາກ ບ້ານນາ​ແປ້ ເມືອງຄຳເກີດ ຫຼື ເປັນເຂດ ທີ່ ຕິດກັບ ຊາຍແດນແກວ ໄດ້ມາຢູ່ທີ່ນີ້ກ່ອນໝູ່ , ຂ້າພະເຈົ້າ ກັສໂປ ນາລາດ ເປັນ ລູກ​ຊາຍ ຂອງ ​ລູກສາວ ພໍ່ຕູ້​ຊຽງ​ຄຸນ ກັບ ແມ່ຕູ້​ຊ້ອນ ຫຼື ໄດ້ເກີດ​ຢູ່ໃນ ຕະກູນ ” ວົງສະຫວັນ ” ຢ່າງແທ້ຈິງ …

ອີງຕາມ ພໍ່ຕູ້ 04 ອ້າຍນ້ອງ ຕະກູນ ” ວົງສະຫວັນ ” ເພີ່ນ ​ເລົ່າເລື່ອງ ຄວາມ​ສັກສິດ ຂອງ ຖ້ຳເຈົ້າພຣະບາດ ຫຼື ເຈົ້າ​ພຣະບາດ ຊື່ : ສຸຂະຫັດຖີ ໃຫ້ຟັງ ວ່າ : ໃນສະໄໝຣາຊອານາຈັກລາວ ໄດ້ມີ​ພວກ​ທະຫານ ພາກັນຂີ່ເຮືອໄປຖີ້ມຣະເບີດ ຢູ່ ປາກ​ຖ້ຳເຈົ້າພຣະບາດ ເພື່ອ ເອົາ​ປາ ຫຼາຍໆ​ເທື່ອ ແຕ່ ລູກລະເບີດ ທີ່ ໄດ້ຖີ້ມລົງນ້ຳ ນັ້ນ ໄດ້ຟູນ້ຳຂື້ນ ແລ້ວ ແຕກໃສ່ພວກທະຫານດັ່ງກ່າວ ແລະ ຫຼາຍໆ​ເທື່ອ ທີ່ ພວກທະຫານໄປຖີ້ມລະເບີດ ເພື່ອ ເອົາປາ ກໍ່​ເປັນແບບນັ້ນ ທຸກໆ​ເທື່ອ , ຢູ່ ບ້ານ​ທ່າ​ພຣະບາດ ຈະ​ບໍ່ມີ​ເດັກນ້ອຍ ໄທບ້ານ ຕາຍຍ້ອນນ້ຳຈັກເທື່ອ ຕົວຢ່າງ ຕອນຍັງນ້ອຍ ພວກ ຂ້າພະເຈົ້າ ກັສໂປ ນາລາດ ກັບ ໝູ່ຫຼາຍຄົນ ພາກັນຫຼີ້ນແຂ້ໄລ່ກີນກັນ ຢູ່ ນ້ຳ​ຂອງ​ແຫ່ງ​ນີ້ ກວ້າງປະມານ 800 ແມັດ ແລະ ກໍ່ມີບາງຄັ້ງໄດ້ ລອຍໄລ່​ກັນ ຈົນຂ້າມຮອດ ບ້ານ​ໂພນ​ແພງ ( ວັດ​ໂພນ​ເງີນ ຕາມ​ຮູບປັ້ນນີ້ ) ເພາະ ຈຳພວກເງືອກງູ ຈະບໍ່ເຂົ້າມາໃກ້ຂອບເຂດ ຂອງ ເຈົ້າສຸຂະຫັດຖີ ຫຼື ເຈົ້າພຣະບາດໄດ້ , ຍາມລະດູໜາວ ໄທບ້ານຫຼາຍຄົນ ມັກຈະເຫັນ ງູ​ໃຫຍ່​ມີ​ຂະໜາດ ເທົ່າກັບລຳຕົ້ນຕານ ນອນຕາກແດດຫຼີ້ນ ຢູ່ດອນຊາຍ ໃກ້ໆກັບຖ້ຳເຈົ້າ ແຫ່ງນັ້ນ , ຕາມຕຳນານກ່າວ ວ່າ ຢູ່​ຖ້ຳເຈົ້າ ຂ້າງໃນ ແມ່ນເປັນອູໂມງໃຫຍ່ ຄ້າຍເມືອງບາດານ ຍາວຢັ່ງຢຽດ ໄປເຖີງ ຮອຍ​ພຣະບາດ ທີ່ຕັ້ງຢູ່ບ້ານພຣະບາດ ປະມານ ກິໂລແມັດ​ກວ່າໆ ເພາະ ເຈົ້າສຸຂະຫັດຖີ ໄປ​ໄຫວ້ພຣະ ແລະ ຈຳ​ສີນຢູ່ໃຕ້​ບາດານ ເຊີ່ງ ຢູ່ເຊີ່ງກັນກັບ ຮອຍພຣະບາດ ຢູ່ຂ້າງເທີ່ງນັ້ນ , ແລະໄດ້ມີຫຼາຍໆປະກົດການ ທີ່ມະຫັດ​ສະ​ຈັນ ຢູ່ ຂອບເຂດ​ນັ້ນ ເຊັ່ນ : ເດືອນ 11 ເພັງ ຈະມີບັ້ງໄຟພະຍານາກ ປະກົດ​ເກີດຂື້ນ ທຸກໆ​ປີ ແລະ ອື່ນໆ ທີ່ຢາກເລົ່າສູ່ຟັງ ແຕ່ຕອ້ງອູບໄວ້ ເພາະ ຢ້ານເພື່ອນໆ ກ່າວຫາ​ວ່າ ” ຂີ້ໂມ້ ” …

ການໄຫວ້ ຮອຍພຣະບາດ ຈະ​ມີ​ຊື່ ສຸ​ຂະ​ຫັດ​ຖີ ລະບຸ​ໄວ້ຢູ່ໃນ ຄຳໄຫວ້ຮອຍພຣະບາດ ເພາະ ເປັນ​ການ​ໃຫ້ກຽດ ແກ່ ເຈົ້າ​ພຣະບາດ ຫຼື ເຈົ້າສຸຂະຫັກຖີ ຍ້ອນ ເປັນຜູ້ຂໍຮອຍພຣະບາດ ໄວ້ເປັນສີ່ງສັກກະຣະບູຊາ … ຂໍທ່ານພິສູດຄວາມຈີງ ໂດຍ ການໄປທ່ອງທ່ຽວ ແລະ ໄປກາບໄຫວ້ຮອຍ ພຣະບາດໂພນສັນ ແລ້ວທ່ານ​ຈະ​ເຫັນ​ຄວາມ​ຈີງວ່າ : ຄຳໄຫວ້ຮອຍພຣະບາດ ຈະ​ມີ​ຊື່ ສຸ​ຂະ​ຫັດ​ຖີ ລະບຸໄວ້ ແທ້​ຈີງ …
ບັນດາທ່ານ ໄດ້ອ່ານແລ້ວ ຄົງແປກໃຈວ່າ : ເຈົ້າສຸຂະຫັດຖີ ຢູ່​ລາວ ແຕ່ເປັນຫຍັງ ? ຝັ່ງຂວາ ຢູ່ບ້ານ​ໂພນ​ແພງ ຈື່ງສ້າງຮູບປັ້ນຈຳລອງ ຂອງເຈົ້າພຣະບາດ ໄວ້ຢູ່ ແຄມທ່ານ້ຳ ວັດໂພນເງີນ , ຄວາມ​ຈີງ​ກໍ່ເພາະ ການເຫຼື້ອມໃສໃຈສັດທາ ຫຼື ຄົນທັງໝົດຊາວບ້ານຂອບເຂດ ສອງຝາກຝັ່ງນ້ຳຂອງ ແຫ່ງນີ້ ນັບຕັ້ງແຕ່ 100 ກວ່າ​ປີ​ຜ່ານມາ ພວກເຂົາເຈົ້າຝັ່ງນັ້ນ ກໍ່ໄດ້ພາກັນຂ້າມໄປ-ຂ້າມ​ມາ ເໝືອນກັບເປັນຄົນປະເທດດຽວກັນ ເພື່ອກາບໄຫວ້ ສັກກະຣະບູຊາ ຮອຍພຣະບາດໂພນສັນ ແລະ ເຈົ້າພຣະບາດໂພນສັນ ຢ່າງ​ເນື່ອງ​ນິດ ບໍ່ໄດ້​ຂາດ​ໄລຍະ ແລະ ອີກ​ປະການ​ໝື່ງ ຄົນ​ຝັ່ງ​ນັ້ນ ພວກເຂົາກໍ່ແມ່ນເຊື້ອຊາດເຜົ່າ ພົງພັນ​ລາວດຽວກັນ ເຊີ່ງນັບຖືສາສະໝາພຸດ ຮີດຄອງປະເພນີ ເຊັ່ນດ້ວຍກັນ , ຈື່ງບໍ່ເປັນໜ້າແປກປະຫລາດໃດໆ ທັງ​ສີ້ນ

ຂອບໃຈຂໍ້ມູນ: Art and Culture of Laos