ເກີດເຫດ ໄຟໄໝ້ເຮືອນປະຊາຊົນ 2 ຫລັງ ທີ່ບ້ານຜາຫວາຍ ເມືອງພູຄູນ

ໃນວັນທີ 24 ມັງກອນ 2021ນີ້ ໄດ້ເກີດເຫດໄຟໄໝ້ເຮືອນປະຊາຊົນ ທີ່ບ້ານຜາຫວາຍ ກຸ່ມບ້ານຈີມ ເມືອງພູຄູນ ແຂວງຫຼວງພະບາງ ເຮືອນທີເກີດໄຟໄໝ້ ເປັນເຮືອນໄມ້ຊັ້ນດຽວ, ມຸງດ້ວຍຫຍ້າ ຈຳນວນ2ຫຼັງ ເສຍຫາຍໝົດທັງຫຼັງ

ຜ່ານການສືບສວນ-ສອບສວນເບື້ອງຕົ້ນຂອງເຈົ້າທີຕຳຫຼວດສືບສວນ-ສອບສວນ ພະແນກຕຳຫຼວດ ກອງບັນຊາການປ້ອງກັນຄວາມສະຫງົບເມືອງພູຄູນ ຕໍ່ພະຍານ ແລະ ຜູ້ທີເຫັນເຫດການ ໄດ້ໃຫ້ຮູ້ວ່າ: ເວລາປະມານ 14:30 ນາທີ ໄດ້ເກີດໄຟໄໝ້ຈາກເຕົາໄຟຂອງເຮືອນຫຼັງທີ່ເປັນຫໍພັກຄູສອນ ທີ່ຄອບຄົວຂອງປະຊາຊົນ ບ້ານຜາຫວາຍ ອາໄສຢູ່ຊົວຄາວ ເຊິ່ງເປັນເຮືອນຫຼັງຕົ້ນໄຟ ປະຊາຊົນໄດ້ໃຊ້ເວລາ ພ້ອມກັນມອດໄຟແຕ່ບໍ່ສາມາດດັບໄດ້ ເນື່ອງຈາກສະພາບອາກາດແດດກ້າ ແລະ ມີລົມພັດ ສົມທົບກັບເຮືອນຈຸດເກີດເຫດເປັນວັດຖຸທີເຮັດໃຫ້ເກີດເຊື້ອໄຟຢ່າງດີ

ຈາກນັ້ນໄດ້ລຸກໄໝ້ຢ່າງໄວວາ ແລະ ລາມໄປເຮືອນອີກຫຼັງທີ່ຢູ່ຕິດກັນ ລວມມີເຄືອງໃຊ້ໃນເຮືອນ, ເຂົ້າເປືອກ, ໄມ້ປູກສ້າງ ແລະ ເງິນສົດ ຈຳນວນໜຶ່ງເສຍຫາຍ ແຕ່ໂຊກດີທີບໍ່ມີຄົນໄດ້ຮັບບາດເຈັບ ແລະ ເສຍຊີວິດ ຜົນການປະເມີນຄ່າເສຍຫາຍເບື້ອງຕົ້ນ ແມ່ນມີມູນຄ່າທັງໝົດ 45.000.000 ກີບ ສາເຫດຂອງການເກີດອັກຄີໄພໃນຄັ້ງນີ້ ແມ່ນເກີດຈາກການຂາດສະຕິໃນການມອບດັບໄຟ ກ່ອນອອກຈາກເຮືອນ.

ຂ່າວ: ວັນທຽນ ຄຳທະສິດ.