ຮອດປີ 2030 ຈະເຮັດໃຫ້ສປປ ລາວ ໄດ້ມີເນື້ອທີ່ປ່າໄມ້ ແລະ ມີປ່າໄມ້ປົກຫຸ້ມ ກວມເອົາ 70%

ກົມປ່າໄມ້, ກະຊວງກະສິກໍາ ແລະປ່າໄມ້ ໄດ້ຈັດກອງປະຊຸມທາບທາມ ຮ່າງ ຍຸດທະສາດປ່າໄມ້ ໃນໄລຍະປີ 2021-2030 ໃນວັນທີ 21 ມັງກອນ 2021 ນີ້ ທີ່ຫ້ອງປະຊຸມໂຮງແຮມວັງທອງ, ແຂວງຫຼວງພະບາງໃຫ້ກຽດເປັນປະທານຮ່ວມໂດຍ ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກໍາ ແລະ ປ່າໄມ້, ທ່ານ ນາງ ສີລິພອນ ສຸພັນທອງ ຮອງເຈົ້າແຂວງໆຫຼວງພະບາງ, ມີພາກສ່ວນກ່ຽວຂ້ອງຈາກບັນດາແຂວງພາກເໜືອເຂົ້າຮ່ວມ.

 

ທ່ານ ທອງພັດ ວົງມະນີ ໄດ້ກ່າວ ວ່າ: ໄລຍະຜ່ານມາ ໄດ້ຈັດກອງປະຊຸມສໍາເລັດແລ້ວ 2 ພາກຄື: ເຂດພາກກາງ ແລະ ພາກໃຕ້ ສໍາລັບກອງປະຊຸມໃນຄັ້ງນີ້ ແມ່ນເປັນຄັ້ງທີ 3 ຈຸດປະສົງແມ່ນເພື່ອຄົ້ນຄວ້າ ແລະ ປະກອບຄໍາຄິດເຫັນ ໃສ່ຮ່າງຍຸດທະສາດປ່າໄມ້ ຮອດປີ 2030 ເພື່ອເຮັດໃຫ້ ຍຸດທະສາດດັ່ງກ່າວມີເນື້ອໃນຄົບຖ້ວນສົມບູນແບບ, ສອດຄ່ອງກັບການຂະຫຍາຍຕົວ ຂອງເສດຖະກິດ-ສັງຄົມ ໃນປັດຈຸບັນ ພ້ອມທັງໃຫ້ແທດເໝາະກັບນະໂຍບາຍການຄຸ້ມຄອງປ່າໄມ້ ແລະ ຊັບພະຍາກອນປ່າໄມ້ ຂອງພັກ ແລະ ລັດຖະບານ ທັງແນ່ໃສ່ແກ້ໄຂປະກົດການຫຍໍ້ທໍ້ທີ່ພົ້ນເດັ່ນໃນຂົງເຂດວຽກງານຄຸ້ມຄອງປ່າໄມ້ ແລະ ຊັບພະຍາກອນປ່າໄມ້ ຮອດປີ 2030 ເຮັດໃຫ້ ສປປ ລາວ ໄດ້ມີເນື້ອທີ່ປ່າໄມ້ ແລະ ມີປ່າໄມ້ປົກຫຸ້ມ ກວມເອົາ 70%. ເນັ້ນໃສ່ວຽກງານປົກປັກຮັກສາຊັບພະຍາກອນທໍາມະຊາດ ແລະ ສິ່ງແວດລ້ອມ, ຄຸ້ມຄອງ ແລະ ຟື້ນຟູ 3 ປະເພດປ່າ, ລວມທັງ ສົ່ງເສີມການປູກໄມ້ເພື່ອເປັນສິນຄ້າໃນເຂດປ່າຜະລິດ.

 

ໃນກອງປະຊຸມ ທ່ານ ພູທອນ ໂສພາທິລາດ ຫົວໜ້າພະແນກແຜນການ ແລະ ການຮ່ວມມື, ກົມປ່າໄມ້ ໄດ້ຂຶ້ນຜ່ານບົດສະຫຼຸບຕີລາຄາການຈັດຕັ້ງປະຕິບັດຍຸດທະສາດປ່າໄມ້ 2020 ແລະ ສະເໜີຄວາມເປັນມາ, ຂະບວນການ ແລະໂຄງຮ່າງຍຸດທະສາດປ່າໄມ້ ຮອດປີ 2030.

ສໍາລັບ, ເນື້ອໃນທີ່ຄົ້ນຄວ້າໃນຄັ້ງນີ້ ແມ່ນໄດ້ເນັ້ນໃສ່ ໂຄງຮ່າງ ຂອງຍຸດທະສາດ, ການກໍານົດວິໄສທັດ, ຈຸດປະສົງ, ຄາດໝາຍສູ້ຊົນ, ທິດທາງ, ນະໂຍບາຍ ແລະ ຫຼັກການ ໃນການຈັດຕັ້ງປະຕິບັດ. ລວມທັງ, ເນື້ອໃນທີ່ໄດ້ກໍານົດໄວ້ໃນແຜນງານ, ໂຄງການ ແລະ ບັນດາຈຸດສຸມທີ່ຢູ່ໃນຍຸດທະສາດດັ່ງກ່າວ. ໃນກອງປະຊຸມ ຜູ້ເຂົ້າຮ່ວມຍັງໄດ້ ປະກອບຄໍາຄິດຄໍາເຫັນ ແລກປ່ຽນບົດຮຽນຢ່າງກົງໄປກົງມາ ເພື່ອນໍາເອົາບາງຄໍາຄິດຄໍາເຫັນ ມາປັບປຸງໃສ່ຮ່າງຍຸດທະສາດດັ່ງກ່າວໃຫ້ມີເນື້ອໃນຄົບຖ້ວນ ແລະ ມີຄວາມສອດຄ່ອງກັບວຽກງານທີ່ຈະຈັດຕັ້ງປະຕິບັດໃນຕໍ່ໜ້າ.

ຂ່າວ: ສອນເພັດ ສຸລິພອນ
ໜັງສືພິມ ປະຊາຊົນ