ຣັດເຊຍ ມອບວັກຊີນປ້ອງກັນໂຄວິດແກ່ລາວ

ໃນວັນທີ 20/1/2021 ທີ່ກະຊວງສາທາລະນະສຸກ ແຫ່ງ ສປປ ລາວ ໄດ້ມີພິທີມອບຮັບວັກແຊັງປ້ອງກັນພະຍາດໂຄວິດ-19 (COVID-19) ສະປຸດນິກ ວີ (Sputnik V). ປະເທດລາວ ເປັນໜຶ່ງໃນປະເທດ ທີ່ໄດ້ຕັດສິນໃຈນຳໃຊ້ວັກແຊັງຂອງຣັດເຊຍເຂົ້າໃນການຕໍ່ສູ້ເພື່ອຕ້ານເຊື້ອພະຍາດລະບາດ COVID-19 ເຊັ່ນດຽວກັບບັນດາປະເທດອື່ນໆໃນໂລກ.


ກອງທຶນເພື່ອການລົງທຶນໂດຍກົງຂອງຣັດເຊຍໄດ້ລົງນາມໃນຂໍ້ຕົກລົງກັບບໍລິສັດລາວແອັດແລນຕິກໃນການສະໜອງວັກແຊັງໂດຍມີການຮ່ວມມືຢ່າງໃກ້ຊິດກັບກະຊວງສາທາລະນະສຸກແຫ່ງ ສປປ ລາວ ເຊິ່ງຕົກລົງເຫັນດີເປັນເອກະພາບວ່າ, ການສະໜອງວັກແຊັງໃນປະລິມານທີ່ຈຳເປັນຈາກຣັດເຊຍຈະໄດ້ດຳເນີນໃນທ້າຍປີ 2021 ນີ້ ຫຼັງຈາກສຳເລັດລົງທະບຽນການນຳໃຊ້ວັກແຊັງ ໂດຍມີຄະນະຜູ້ແທນຣັດເຊຍ ນຳໂດຍທ່ານເອກອັກຄະລັດຖະທູດລັດເຊຍປະຈຳ ສປປ ລາວ – ທ່ານ ວະລາດີມີຣ ກາລີນິນ (Vladimir Kalinin) ແລະ ຄະນະຜູ້ແທນລາວ – ນຳໂດຍທ່ານ ຮອງລັດຖະມົນຕີກະຊວງສາທາລະນະສຸກ ຮສ. ດຣ. ພູທອນ ເມືອງປາກ.

“Sputnik V” ແມ່ນຢາວັກຊີນທີ່ລົງທະບຽນເປັນຄັ້ງທຳອິດຂອງໂລກທີ່ມີປະສິດທິພາບທາງດ້ານຄລີນິກເທົ່າກັບ 91,4% ແລະ 100% ສໍາລັບກໍລະນີຮ້າຍແຮງ ທີ່ພັດທະນາໂດຍ ສູນລະບາດວິທະຍາ ເເລະ ຈຸລິນຊີວິທະຍາແຫ່ງຊາດ ກາມາເລຢາ, ເຊິ່ງເປັນໜຶ່ງໃນສະຖາບັນຄົ້ນຄວ້າຊັ້ນນຳຂອງໂລກ. ຂ້າພະເຈົ້າຈະເນັ້ນໜັກວ່າໃນປະຈຸບັນນີ້ ພົນລະເມືອງຂອງຣັດເຊຍເກືອບ 1 ລ້ານຄົນ ໄດ້ຮັບການສັກຢາ “Sputnik V” ເປັນທີ່ຮຽບຮ້ອຍແລ້ວ ໂດຍບໍ່ມີຜົນຂ້າງຄຽງໃດໆ.

ຫລາຍກວ່າ 50 ປະເທດ ໄດ້ຍື່ນໃບສະໝັກສໍາລັບການຊື້ຢາວັກຊີນຂອງຣັດເຊຍປະມານ 1,2 ຕື້ໂດສ, ໂດຍສະເພາະ ປະເທດ ຫວຽດນາມ, ອິນໂດເນເຊຍ, ມາເລເຊຍ ແລະ ຟີລິບປິນ ພາຍໃນປະຊາຄົມອາຊຽນ.