ພົບຜູ້ຕິດເຊື້ອໄຂ້ຍຸງລາຍເພີ່ມຂຶ້ນ 10 ກໍລະນີ

ຂປລ. ໃນວັນທີ 20 ພະຈິກ 2020, ທ່ານ ດຣ ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ແຈ້ງໃຫ້ຮູ້ ກ່ຽວກັບສະພາບການລະບາດຂອງໄຂ້ຍຸງລາຍ ໃນ ສປປ ລາວ ວ່າ: ໃນວັນທີ 19 ພະຈິກ 2020 ສປປ ລາວ ມີຜູ້ຕິດເຊື້ອໄຂ້ຍຸງລາຍທັງໝົດ 10 ກໍລະນີ ແລະ ບໍ່ມີຜູ້ເສຍຊີວິດ.

ນັບແຕ່ວັນທີ 01/01/2020-19/11/2020 ມີຜູ້ຕິດເຊື້ອກໍລະນີສະສົມທັງໝົດ 7.921 ຄົນ (ມີລາຍງານກໍລະນີໃນ 18 ແຂວງ, ແຂວງທີ່ມີການລາຍງານຫລາຍກວ່າໝູ່ແມ່ນ ນະຄອນຫລວງວຽງຈັນ ມີເຖິງ 1.904 ຄົນ, ຖັດລົງມາແມ່ນບໍລິຄຳໄຊ 920 ຄົນ, ບໍ່ແກ້ວ 740 ຄົນ ແລະ ວຽງຈັນ 709 ຄົນ). ຈຳນວນຜູ້ເສຍຊີວິດຍ້ອນພະຍາດໄຂ້ຍຸງລາຍມີ ທັງໝົດ 12 ຄົນ (ນະຄອນຫລວງ 04 ຄົນ, ບໍລິຄຳໄຊ 02 ຄົນ, ຄຳມ່ວນ 02 ຄົນ, ໄຊຍະບູລີ 01 ຄົນ, ຊຽງຂວາງ 01 ຄົນ, ສະຫວັນນະເຂດ 01 ຄົນ ແລະ ຜົ້ງສາລີ 01 ຄົນ).

ທ່ານ ດຣ. ພອນປະເສີດ ໄຊຍະມຸງຄຸນ ກ່າວຕື່ມອີກວ່າ: ເພື່ອທຳລາຍແຫລ່ງເພາະພັນຂອງໜອນນ້ຳຍຸງລາຍ ຈຶ່ງຂໍຮຽກຮ້ອງມາຍັງ ພໍ່ແມ່ປະຊາຊົນ, ຊຸມຊົນ ແລະ ອຳນາດການປົກຄອງທຸກຂັ້ນ ຮ່ວມແຮງຮ່ວມໃຈ ໃນການປະຕິບັດ 5ປ ຢ່າງເຄັ່ງຄັດໃຫ້ເປັນປະຈຳ,

ອີກປະການໜຶ່ງເມື່ອເຂົ້າສູ່ລະດູໜາວ ສະ ພາບອາກາດມີການປ່ຽນແປງ ເຮັດໃຫ້ສາມາດເປັນພະຍາດໄຂ້ຫວັດໄດ້ງ່າຍຂຶ້ນ ຂໍໃຫ້ບັນດາທ່ານເອົາໃຈ ໃສ່ສຸຂະພາບຂອງທ່ານ, ກິນອາຫານໃຫ້ຄົບ 5 ໝູ່, ອອກກຳລັງກາຍ, ນອນພັກຜ່ອນໃຫ້ພຽງພໍ ແລະ ດື່ມນ້ຳເລື້ອຍໆ. ຖ້າທ່ານເປັນໄຂ້ໃຫ້ຮີບຮ້ອນໄປພົບແພດໝໍ ບໍ່ໃຫ້ຊື້ຢາມາກິນເອງ ເພື່ອຈະໄດ້ຮັບການປິ່ນປົວຢ່າງທັນການ.

ຂ່າວ: ສົມຫວັງ