ທີມຈໍາປາສັກ ທິບພະຈັນ ຍິງ 2 ປະຕູພາທີມດັບຝັນ ນະຄອນຫຼວງ ເຂົ້າຮອບຊີງ

ທິບພະຈັນ ຄໍາໃບອ່ອນ ກອງໜ້າດາວເດັ່ນຂອງແຂວງຈໍາປາສັກ ເໝົາ 2 ປະຕູຊ່ວຍທີມເອົາພິກເອົາຊະນະ ນະຄອນຫຼວງວຽງຈັນ ໄປສຸດມັນ 2-1 ໃນການແຂ່ງຂັນບານເຕະທົ່ວປະເທດ ຮອບ 4 ທີມສຸດທ້າຍ ປະຈໍາວັນທີ 19 ພະຈິກ 2020.

ນັດດັ່ງກ່າວ ແຂວງຈໍາປາສັກ ພົບຄວາມກົດດັນຢ່າງໜັກ ຫຼັງເປັນຝ່າຍຕົກຕາມຫຼັງກ່ອນ 0-1 ຈາກການຍິງຂອງ ຊາຍ ກອງໜ້າຂອງນະຄອນຫຼວງ ກ່ອນຈົບເຄິ່ງເວລາທໍາອິດ ນະຄອນຫຼວງ ຂຶ້ນນໍາກ່ອນ 1-0.

ແຕ່ເຄິ່ງເວລາທີ 2 ຈໍາປາສັກ ບຸກຢ່າງໜັກຕະຫຼອດທັງເກມ ຈົນໄລຍະທ້າຍເກມ ທິບພະຈັນ ຄໍາໃບອ່ອນ ກອງໜ້າດາວເດັ່ນ ຈາກທີມຊາດລາວ ຢູ 16 ເໝົາຄົນດຽວ 2 ປະຕູລວດພາຍໃນໄລຍະເວລາ 5 ນາທີຊ່ວຍໃຫ້ກັບ ຈໍາປາສັກ ພິກເອົາຊະນະ ນະຄອນຫຼວງ 2-1.

ຈາກຜົນດັ່ງກ່າວ ເຮັດໃຫ້ ຈໍາປາສັກ ທະລຸເຂົ້າຮອບຊີງຊະນະເລີດໄປພົບກັບ ແຂວງຫຼວງພະບາງ ທີ່ເອົາຊະນະ ສະຫວັນນະເຂດ 3-0, ເຊິ່ງຮອບຊີງຊະນະເລີດຈະມີຂຶ້ນໃນວັນທີ 21 ພະຈິກ 2020 ທີິ່ສະໜາມກີລາແຫ່ງຊາດ ຫຼັກ 16 ເວລາ 18:00 ໂມງ
ພາບ-ຂ່າວ :ຂ່າວ ເສດຖະກິດ-ການຄ້າ