ຈັບຍົກແກ໊ງ! ຈັບ 1 ຂະຫຍາຍຜົນໄດ້ອີກ 9 ຄົນ

ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງໄຊເສດຖາ ນະຄອນຫຼວງວຽງຈັນ ສືບຮູ້ວ່າ ມີເປົ້າໝາຍຄ້າຂາຍຢາເສບຕິດຢູ່ບ້ານໂຊກຄຳ ເມືອງໄຊເສດຖາ ຈຶ່ງໄດ້ຕິດຕາມການເຄື່ອນໄຫວຂອງເປົ້າໝາຍ ຈົນສາມາດກັກຕົວໄດ້ຢູ່ເຮືອນພັກແຫ່ງໜຶ່ງ ເຂດບ້ານໂນນຄໍ້ໃຕ້ ເມືອງໄຊເສດຖາ ພ້ອມຂອງກາງຢາບ້າ 970 ເມັດ.

ໃນເວລານັ້ນ, ຫ້ອງຂ້າງຂອງເປົ້າໝາຍມີການມົ້ວສຸມຢາເສບຕິດ ຈຶ່ງໄດ້ບຸກເຂົ້າມ້າງທັນທີ ກັກຕົວໄດ້ເພີ່ມອີກ 9 ຄົນ; ໃນນັ້ນ, 3 ຄົນ ມີຂອງກາງຢາບ້າ 190 ເມັດ.

ເຫດການດັ່ງກ່າວນີ້, ເຈົ້າໜ້າທີ່ໃຫ້ຮູ້ວ່າ: ພາຍຫຼັງສືບຮູ້ວ່າ ເປົ້າໝາຍຄ້າຂາຍຢາເສບຕິດຊື່: ນາງ ປານ້ອຍ ອາຍຸ 20 ປີ ຢູ່ບ້ານໂຊກຄຳ ໄດ້ເຊົ່າ ຫ້ອງບ້ານພັກຢູ່ເຂດບ້ານໂນນຄໍ້ໃຕ້ ເພື່ອເຄື່ອນໄຫວຄ້າຂາຍຢາເສບຕິດ, ເຈົ້າໜ້າທີ່ ໄດ້ສົ່ງພະນັກງານວິຊາສະເພາະລົງຕິດຕາມ ແລະ ກວດກາ ພົບວ່າແມ່ນຄວາມຈິງແທ້.

ມາວັນທີ 10 ພະຈິກ 2020, ກໍສືບຮູ້ວ່າ ນາງ ປານ້ອຍ ໄດ້ຊື້ຢາບ້າມາໄວ້ຂາຍໃຫ້ກັບໄວລຸ້ນທີ່ມົ້ວສຸມ ຈຶ່ງໄດ້ນຳກຳລັງເຂົ້າປິດລ້ອມເຮືອນພັກດັ່ງກ່າວ ແລ້ວເຂົ້າຈັບຕົວ ນາງ ປານ້ອຍ ພ້ອມຂອງກາງຢາບ້າ 4 ຖົງ ກັບ 170 (ຖົງລະ 200 ເມັດ) ລວມເປັນ 970 ເມັດ;

ໃນຂະນະທີ່ຈັບຕົວ ນາງ ປານ້ອຍ ປະກົດວ່າ ຫ້ອງຂ້າງທີ່ ນາງ ປານ້ອຍ ພັກເຊົາຢູ່ນັ້ນມີການມົ້ວສຸມຢາເສບຕິດ ຈຶ່ງນຳກຳລັງເຂົ້າມ້າງທັນທີກັກ ຕົວຜູ້ຖືກຫາໄດ້ອີກ 9 ຄົນ ຍິງ 3 ຄົນ. ໃນນີ້, ມີ ຂອງກາງຢາບ້າ 3 ຄົນ ຈຳນວນ 190 ເມັດ; ລວມ ຜູ້ຖືກຫາຄ້າຂາຍ ແລະ ມົ້ວສຸມຢາເສບ ຕິດທີ່ຈັບໄດ້ທັງໝົດແມ່ນ 10 ຄົນ ສ່ວນຂອງກາງຢາບ້າ ລວມ 1.160 ເມັດ.

ຜູ້ຖືກຫາທັງ 10 ຄົນ ຄື: ນາງ ປານ້ອຍ ອາຍຸ 20 ປີ ຢູ່ບ້ານໂຊກຄໍາ ມີຂອງກາງຢາບ້າ 970 ເມັດ, ທ້າວ ປະເສີດໄຊ ອາຍຸ 25 ປີ ຢູ່ບ້ານອາມອນ ມີຂອງກາງຢາບ້າ 38 ເມັດ; ນາງ ບຸດສະດາ ຫຼື ຕັ້ນ ອາຍຸ 35 ປີ ຢູ່ບ້ານໂນນຄໍ້ ມີຢາບ້າ 100 ເມັດ; ທ້າວ ຈັນທະວົງ ຫຼື ແຈັກ ອາຍຸ 19 ປີ ຢູ່ ບ້ານໂຊກຄຳ ມີຢາບ້າ 52 ເມັດ; ນາງ ສົມພາວັນ ຫຼື ນຸ່ຍ ອາຍຸ 19 ປີ ຢູ່ບ້ານໂນນຄໍ້ (ມົ້ວສຸມ); ທ້າວ ກົບ ອາຍຸ 18 ປີ ຢູ່ບ້ານຂາມງອຍ (ມົ້ວ ສຸມ);

ນາງ ທອງລຽບ ອາຍຸ 42 ປີ ຢູ່ບ້ານໂຊກຄໍາ (ມົ້ວສຸມ); ນາງ ຟ້າ ອາຍຸ 16 ປີ ຢູ່ບ້ານນາໄຊ (ມົ້ວສຸມ), ທັງໝົດຂຶ້ນກັບເມືອງໄຊເສດຖາ ແລະ ທ້າວ ຈັນທອນ ອາຍຸ 27 ປີ ຢູ່ບ້ານນາປໍ ເມືອງສັງທອງ (ມົ້ວສຸມ).

ປັດຈຸບັນຄະດີດັ່ງກ່າວ, ແມ່ນຍັງຢູ່ໃນຂັ້ນຕອນການສອບສວນຂອງເຈົ້າໜ້າທີ່ ເພື່ອຂະຫຍາຍຜົນຫາທີ່ມາຂອງຢາເສບຕິດ ແລະ ພັກພວກທີ່ຮ່ວມຂະບວນການ ເພື່ອຕິດຕາມກັກຕົວມາດຳເນີນຄະດີ.

ຂ່າວຈາກ: fastfollownews