ຊົມເຊີຍ! ຜ້າໄໝຫລວງພະບາງ ໄດ້ຮັບການຢັ້ງຢືນຖິ່ນກໍາເນີດແລ້ວ

ໃນວັນທີ 23 ກັນຍາ 2020 ທີ່ ນະຄອນຫລວງພະບາງ ແຂວງຫລວງພະບາງ, ທ່ານ ນາງ ຂັນລາສີ ແກ້ວບຸນພັນ ຫົວໜ້າກົມຊັບສິນທາງປັນຍາ, ກະຊວງວິທະຍາສາດ ແລະ ເຕັກໂນໂລຊີ ໄດ້ເຂົ້າຮ່ວມພິທີ ແລະ ມອບໃບຢັ້ງຢືນ ຖິ່ນກໍາເນີດຜ້າໄໝຫລວງພະບາງ ໃຫ້ສະມາຄົມສົ່ງເສີມຜ້າໄໝຫລວງພະບາງຢ່າງເປັນທາງການ

 

ໂອກາດດັ່ງກ່າວ, ທ່ານ ນາງ ຂັນລາສີ ແກ້ວບຸນພັນ ກ່າວວ່າ: ການຈົດທະບຽນປົກປ້ອງຖິ່ນກໍາເນີດຜ້າໄໝຫລວງພະບາງກໍແມ່ນເພື່ອປົກປ້ອງຊື່ສຽງຂອງຜ້າໄໝຫລວງພະບາງ ທັງເປັນການປົກປ້ອງພູມປັນຍາຊຸມຊົນ ໃນທ້ອງຖິ່ນແບບດັ່ງເດີມ ທີ່ມໍລະດົກສືບທອດມາ ຈາກບັນພະບູລຸດໄດ້ຫລາຍເຊັ່ນຄົນ. ການມອບໃບຢັ້ງຢືນ ຖິ່ນກໍາເນີດຜ້າໄໝຫລວງພະບາງຄັ້ງນີ້, ຈະເປັນການຊ່ວຍໃຫ້ມີການຮັກສາຄຸນນະພາບ ທີ່ເປັນເອກະລັກຂອງຜ້າໄໝຫລວງພະບາງໄວ້ ພາຍຫລັງການຈົດທະບຽນ ແລະ ຈະມີການກວດກາ ທຸກຂັ້ນຕອນການຜະລິດ ໂດຍສະມາຄົມສົ່ງເສີມ ຜ້າໄໝຫລວງພະບາງ ຢ່າງເປັນລະບົບຄົບຊຸດ ໂດຍຈະຢັ້ງຢືນຄວາມຖືກຕ້ອງ ຕາມເອກະສານ ຄຸນລັກສະນະສະເພາະຂອງຜ້າໄໝຫລວງພະບາງ ຈາກໜ່ວຍງານຢັ້ງຢືນພາຍໃນປະເທດ ຫລື ສາກົນ.

ນອກຈາກນັ້ນ, ການຈົດທະບຽນປົກປ້ອງຖິ່ນກໍາເນີດຍັງຈະເຮັດໃຫ້ຜ້າໄໝຫລວງພະບາງ ມີມູນຄ່າເພີ່ມສູງຂຶ້ນ ເນື່ອງຈາກຜ້າໄໝຫລວງພະບາງ ຈະຕ້ອງໄດ້ຜ່ານການກວດກາຕາມຂັ້ນຕອນ ການຜະລິດທີ່ກໍານົດໄວ້ ແລະ ໄດ້ຮັບການຢັ້ງຢືນຈາກໜ່ວຍງານທີ່ກ່ຽວຂ້ອງທີ່ໄດ້ຮັບຮອງຕາມມາດຕະຖານສາກົນ ທີ່ຄຸ້ມຄອງໂດຍກົມຊັບສິນທາງປັນຍາ ກະຊວງວິທະຍາສາດ ແລະ ເຕັກໂນໂລຊີ ຈຶ່ງຈະສາມາດຕິດກາໝາຍຖິ່ນກໍາເນີດແຫ່ງຊາດ ແລະ ວາງຈໍາໜ່າຍໃນທ້ອງຕະຫລາດ ແລະ ສົ່ງອອກໄປຕ່າງປະເທດໄດ້ ເພື່ອເປັນການຮັບ ປະກັນຕໍ່ຜູ້ບໍລິໂພກວ່າ ເປັນສິນຄ້າມີຄຸນນະພາບ ທີ່ເປັນເອກະລັກ ແລະ ແຫລ່ງທີ່ມາທີ່ແທ້ຈິງຂອງສິນຄ້າ.