ໂວ ຫງຽນ ກ໋ຽບ ນາຍພົນຫວຽດນາມ ຜູ້ພິຊິດດຽນບຽນຟູ ແລະລາວ

ໂວ ຫວຽນ ກ໋ຽບ (Võ Nguyên Giáp) ຄືຊື່ຂອງຍອດນາຍພົນທີ່ຄົນຫວຽດນາມຮັກ ແລະເຄົາຮົບຫລາຍທີ່ສຸດຄົນຫນື່ງໃນປະຫວັດສາດປະເທດ ທ່ານເກີດໃນປີ ຄສ 1911 ທີ່ແຂວງກວ໋າງບິ່ນ (Quảng Bình) ທາງພາກກາງຂອງປະເທດຫວຽດນາມ ຄອບຄົວເປັນຊາວນາ ທ່ານເປັນເດັກທີ່ສົນໃຈປະຫວັດສາດສົງຄາມ ແລະມັກອ່ານຫນັງສືກ່ຽວກັບຍຸດທະສາດການຮົບເປັນຢ່າງຫລາຍ ທ່ານມີຄວາມສະຫຼຽວສະຫລາດ ແລະຮຽນເກັ່ງຈົນສາມາດເສັງເຂົ້າສຶກສາຕໍ່ທີ່ໂຮງຮຽນກົດຫມາຍຮ່າໂນຍ ແລະສຳເລັດການສຶກສາດ້ານເສດຖະສາດ ແລະການເມືອງ ໃນປີ ຄສ 1938


ຫລັງຮຽນຈົບກໍ່ໄດ້ເຮັດວຽກເປັນຄູສອນປະຫວັດສາດ ແລະນັກຫນັງສືພິມຢູ່ໄລຍະຫນື່ງຈົນໄດ້ພົບກັບ ໂຮ ຈິ ມິນ ຫົວຫນ້າພັກຄອມມູນິດຫວຽດນາມໃນຂະນະນັ້ນ ຈື່ງຕັດສິນໃຈເຂົ້າຮ່ວມພັກ ແລະຕໍ່ມາທ່ານກໍ່ເປັນຜູ້ຮ່ວມງານຄົນສຳຄັນຂອງ ໂຮ ຈິ ມິນ ແລະຍັງໄດ້ຮ່ວມກໍ່ຕັ້ງ ກຸ່ມຫວຽດມິນ ເພື່ອຕໍ່ຕ້ານການປົກຄອງຂອງຝຣັ່ງອີກດ້ວຍ ໃນປີ ຄສ 1954 ໂວ ຫງຽນ ກ໋ຽບ ໄດ້ຮັບຄວາມໄວ້ວາງໃຈຈາກ ໂຮ ຈິ ມິນ ໃຫ້ດຳລົງຕຳແຫນ່ງຜູ້ບັນຊາການຮົບໃນສົງຄາມ ດຽນ ບຽນ ຟູ (Dian Bien Phu) ທີ່ຢູ່ທາງພາກເຫນືອຂອງປະເທດ ເນື່ອງຈາກຂະນະນີ້ຝຣັ່ງຕ້ອງການກັບມາເປັນເຈົ້າອານານິຄົມໃນອິນໂດຈີນອີກຄັ້ງ ກຸ່ມກູ້ຊາດຫວຽດມິນ ພາຍໃຕ້ການນຳຂອງ ນາຍພົນໂວ ຫວຽນ ກ໋ຽບ ໄດ້ໃຊ້ຍຸດທະວິທີການຮົບແບບ ອ່ອນຊະນະແຂງ ກ່າວຄື ກຸ່ມຫວຽດມິນ ມີຂໍ້ຈຳກັດໃນເລື່ອງຂອງງົບປະມານ ແລະອາວຸດຍຸດໂທປະກອນແຕກຕ່າງຈາກກອງທັບຝຣັ່ງທີ່ມີອາວຸດທັນສະໄຫມ ແຕ່ນັ້ນກໍ່ບໍ່ໄດ້ເຮັດໃຫ້ພວກເຂົາຢ້ານ ທະຫານຫວຽດມິນອາໄສຄວາມໄດ້ປຽບໃນເລື່ອງຂອງຈຳນວນຄົນ ແລະຄວາມຊຳນານໃນພູມີປະເທດ ພວກເຂົາລຳລຽງປືນໃຫ່ຍແລ້ວເຄື່ອນຍ້າຍດ້ວຍແຮງຄົນ ແລະສັດຂ້າມພູຫນ່ວຍແລ້ວຫນ່ວຍເລົ່າດ້ວຍຄວາມອຸດສາຫະ ເພື່ອທຳການປິດລ້ອມແລ້ວຍິງຖະຫລົ່ມກອງທັບຝຣັ່ງຢ່າງຫນັກແບບບໍ່ໃຫ້ທັນຕັ້ງໂຕ ກຸ່ມຫວຽດມິນໄດ້ຮັບໄຊຊະນະໃນຍຸດທະການທີ່ ດຽນ ບຽນ ຟູ ຖືເປັນຜົນງານເອກຂອງທ່ານເລີຍກໍ່ວ່າໄດ້


ຜົນຈາກການຮົບຊະນະທີ່ ດຽນ ບຽນ ຟູ ເຮັດໃຫ້ຝຣັ່ງຍອມຖອນຕົວອອກຈາກອິນດູຈີນ ຫວຽດນາມໄດ້ຮັບເອກະລາດ ແລະແບ່ງການປົກຄອງອອກເປັນຫວຽດນາມເຫນືອ ແລະຫວຽດນາມໃຕ້ ນອກຈາກນີ້ນາຍພົນ ໂວ ຫງຽນ ກ໋ຽບ ຍັງເປັນຜູ້ບັນຊາການກອງທັບຫວຽດນາມເຫນືອໃນຍຸດທະການທີ່ໄຊງ່ອນ (ຄສ 1968) ແລະເປັນຜູ້ວາງແຜນ ການຮຸກວັນປີໃຫ່ມ (ກຸດຫວຽດ) ຈົນເຮັດໃຫ້ພັກຄອມມູນິດຫວຽດນາມສາມາດເອົາຊະນະກອງທັບອາເມຣິກາໄດ້ ແລະໃນທີ່ສຸດຫວຽດນາມກໍ່ໄດ້ລວມປະເທດ

ແລະທ່ານນາຍພົນໂວ ຫງຽນ ກ໋ຽບ ຍັງເປັນນັກຍຸດທະສາດທາງທະຫານຜູ້ສຳຄັນທີ່ມີສ່ວນໃນການຊ່ວຍກອງທັບແນວລາວອິດສະຫລະ ຕໍ່ສູ້ກັບຝ່າຍລັດຖະບານວຽງຈັນຈົນໄດ້ຮັບໄຊຊະນະ

ນັກປະຫວັດສາດທາງທະຫານຕາເວັນຕົກຫລາຍຄົນຍົກຍ້ອງ ພົນເອກ ໂວ ຫງຽນ ກ໋ຽບ ໃຫ້ເປັນ ນາໂປລຽນແດງແຫ່ງຫວຽດນາມ ແລະ ນາຍພົນຫ້າດາວ ເປັນຕຳນານແມ່ທັບຕະຫລອດການທຽບເທົ່ານາຍພົນຊື່ດັງຢ່າງ ດັກລາສແມກອາຣເທີ (Douglas MacArthur) ແຫ່ງກອງທັບນາຊີເຢຍລະມັນ ແລະ ເບີນາຣດ ມອນໂກເມີຣີ (Bernard Montgomery) ແຫ່ງກອງທັບອັງກິດ

ພົນເອກ ໂວ ຫງຽນ ກ໋ຽບ ເສຍຊີວິດເມື່ອວັນທີ່ 4 ຕຸລາ  2013 ທີ່ໂຮງຫມໍທະຫານນະຄອນຮ່າໂນຍ ໃນອາຍຸ 102 ປີ ມີການຈັດພິທີຝັງສົບຢ່າງຍິ່ງໃຫ່ຍ ແລະສົມກຽດປະຊາຊົນນັບແສນເດີນທາງມາຮ່ວມພິທີເພື່ອສະແດງຄວາມເຄົາຮົບ ວິລະບູລຸດຂອງຊາດ ທີ່ພວກເຂົາຮັກເປັນຄັ້ງສຸດທ້າຍ

ຫມາຍເຫດ: ປະຫວັດສາດມີໄວ້ໃຫ້ສຶກສາ