ມູນເຫດສົງຄາມອ່າວເປີເຊຍ ການຮຸກຮານຄູເວຕຂອງອີຣັກ

ຍ້ອນກັບໄປໃນເດືອນສິງຫາ ປີ 1990 ອີຣັກ ແລະຄູເວຕມີບັນຫາຄວາມຂັດແຍ່ງກັນຢ່າງຮຸນແຮງ ໂດຍອີຣັກກ່າວຫາຄູເວຕວ່າລັກນ້ຳມັນດ້ວຍການແອບລັກລອບເຈາະນ້ຳມັນໃຕ້ດິນຂອງອີຣັກ ບາງຄົນກໍ່ວ່າລັດຖະບານອີຣັກທີ່ນຳໂດຍຊັດດັມ ຮຸສເຊັນ ເປັນຫນີ້ລັດຖະບານຄູເວຕຈຳນວນມະຫາສານ ໂດຍຫນີ້ສ່ວນນີ້ເກີດຈາກການທີ່ອີຣັກກູ້ຢືມຄູເວຕໄປໃນການໃຊ້ເຮັດສົງຄາມກັບອີຣ່ານເມື່ອຫລາຍປີກ່ອນ

ບໍ່ວ່າເຫດຜົນທີ່ແທ້ຈິງຈະເປັນຢ່າງໃດ ອີຣັກໄດ້ຮຸກຮານຄູເວຕໃນວັນທີ່ 2 ສິງຫາ 1990 ດ້ວຍກຳລັງພົນຈຳນວນມະຫາສານ ແລະແສນຍານຸພາບທີ່ເຫນືອກວ່າ ເຮັດໃຫ້ກອງທັບອີຣັກສາມາດຍຶດຄອງຄູເວຕໄດ້ພາຍໃນສອງວັນເທົ່ານັ້ນ ໂດຍກອງກຳລັງທີ່ເຫລືອລອດຂອງຄູເວຕຕ້ອງຖອຍໄປຍັງປະເທດທີ່ສາມຢ່າງຊາອຸດິອາຣາເບຍ ແລະບາຫເຣນທີ່ເປັນປະເທດເພື່ອນບ້ານ ຊັດດັມ ຮຸສເຊັນ ຜູ້ນຳຂອງອີຣັກໄດ້ປະກາດໃຫ້ຄູເວຕເປັນສ່ວນຫນື່ງຂອງອີຣັກໃນທັນທີ

ສະຫະປະຊາຊາດໄດ້ມີມະຕິໃຫ້ອີຣັກຖອນກຳລັງທະຫານທັນທີໂດຍບໍ່ມີເງື່ອນໄຂ ຂະນະດຽວກັນຊາວຄູເວຕຫລາຍພັນຄົນຕ້ອງຫນີອອກຈາກປະເທດ ພາຍໃນໄລຍະເວລາ 7 ເດືອນພາຍໃຕ້ການປົກຄອງຂອງອີຣັກ ຄູເວຕຖືກປຸ້ນຄວາມລ້ຳລວຍໄປເປັນຈຳນວນຫລາຍ ຍັງບໍ່ລວມເຖິງຊາວຄູເວຕຈຳນວນຫລາຍທີ່ຖືກລະເມີດສິດທິມະນຸດຊະຍະຊົນຢ່າງຮຸນແຮງ
ລັດຖະບານອີຣັກເມີນເສີຍຕໍ່ຂໍ້ຮຽກຮ້ອງຂອງນານາປະເທດແມ່ນແຕ່ກຸ່ມປະເທດທີ່ມີຄວາມໃກ້ຊິດກັບອີຣັກຢ່າງຝຣັ່ງ ແລະອິນເດຍຕ່າງຮຽກຮ້ອງໃຫ້ອີຣັກຖອນກຳລັງທະຫານອອກມາຈາກຄູເວຕທັນທີ

 

ຂະນະດຽວກັນສະຫະພາບໂຊຫວຽດ ແລະຈີນກໍ່ຄົງຈຳຫນ່າຍຍຸດໂທປະກອນທາງທະຫານແກ່ອີຣັກ ຈົນເຂົ້າສູ່ຊ່ວງທ້າຍປີ 1990 ອາເມຣິກາ ແລະກຸ່ມປະເທດພັນທະມິດແອຕແລນຕິກເຫນືອຫລືນາໂຕ້ ໄດ້ປະຊຸມຫາລືກັນ ແລະໄດ້ຂໍ້ສະຫລຸບວ່າອີຣັກຕ້ອງຖອນກຳລັງທະຫານທັງຫມົດອອກຈາກຄູເວຕພາຍໃນວັນທີ່ 15 ມັງກອນ 1991 ແຕ່ວ່າການເຈລະຈາລົ້ມເຫລວ ເມື່ອອີຣັກບໍ່ເຮັດຕາມຂໍ້ສະເຫນີຂອງອາເມຣິກາ ແລະນາໂຕ້ ຈື່ງເປັນມູນເຫດສະນວນສົງຄາມອ່າວເປີເຊຍຄັ້ງທີ່ 1 ໃນເວລາຕໍ່ມາ